होसे 1
Awadhi Bible: Easy-to-Read Version
होसे क जरिये यहोवा परमेस्सर क सन्देस
1 इ यहोवा क उ सन्देस अहइ, जउन बेरी क पूत होसे क जरिये मिला रहा। इ सन्देस उ समइ आवा रहा जब यहूदा मँ उज्जियाह, योताम, आहाज अउ हिजकिय्याह क राज्ज रहा। इ ओन दिनन क बात अहइ जब इस्राएल क राजा योआस क पूत यारोबाम क समइ रहा।
2 होसे बरे इ यहोवा क पहिला सन्देस रहा। यहोवा कहेस, “जा, अउर एक रण्डी स बियाह कइ ल्या जउन आपन रण्डीबाजी स संतान रखेस ह। काहेकि इ देस क लोग रण्डी क तरह बेउहार करत अहइँ। उ पचे यहोवा बरे अबिस्सासी रहेन ह।”
यिज्रेल क जनम
3 तउ होसे दिबलैम क बिटिया गोमेर स बियाह कइ लिहस। गोमेर गर्भवती भइ अउर उ होसे बरे एक ठु पूत क जनम दिहस। 4 यहोवा होसे स कहेस, “एकर नाउँ यिज्रेल राखा। काहे? काहेकि मइँ हाली ही यिज्रेल घाटी मँ कीन्ह गइन हत्या बरे येहू क परिवार क सजा देब फिन एकरे पाछे इस्राएल क बंस क राज्ज क खतम कइ देबउँ। 5 उहइ समइ यिज्रेल घाटी मँ, मइँ इस्राएल क धनुस क तोड़ देब।”
लोरुहामा क जनम
6 एकरे पाछे गोमेर फुन गर्भवती भइ अउर एक ठु कन्या क जन्म दिहस। यहोवा होसे स कहेस, “इ कन्या क नाउँ लोरुहामा राखा। काहेकि मइँ अब इस्राएल क लोगन पइ अउर जियादा दाया नाहीं देखाउब। मइँ ओनका छिमा नाहीं करब। 7 मुला मइँ तउ यहोवा क राज्ज पइ दाया देखाउब। मइँ यहूदा क लोगन क रच्छा करब। मुला ओकरी रच्छा बरे मइँ न तउ धनुस अउर तरवार क प्रयोग करब अउर न ही जुद्ध क घोड़न अउर फउजियन क। मइँ, यहोवा, खुद आपन सक्ती स ओनका बचाउब।”
लोअम्मी क जनम
8 गोमेर अबहीं लोरुहामा क दूध पिआउब तजे ही रही कि उ फुन गर्भवती होइ गइ। तउ उ एक ठु पूत क जनम दिहस। 9 एकरे पाछे यहोवा कहेस, “एकर नाउँ लोअम्मी धरा। काहेकि तू पचे मोर प्रजा नाहीं अहा अउर मइँ तोहार परमेस्सर नाहीं अहउँ।”
परमेस्सर यहोवा क बचन: इस्राएली बेगिनती क होइहीं
10 “तउ पइ भी, भविस्स मँ, इस्राएल मँ अनगिनत लोग होइहीं जइसा सागरे क रेत क कन जउन न तउ नापी जाइ सकत ह अउर न ही जेकर गनती कीन्ह जाइ सकत ह। अउर उहइ जगह पइ जहाँ ओनसे इ कहा ग रहा, ‘तू पचे मोर लोग नाहीं अहा।’ उ पचन्क कहा जाईहीं, ‘तू पचे जिअत परमेस्सर क संतान अहा।’
11 “तउ फुन यहूदा अउ इस्राएल क लोग एक संग ऍकट्ठा होइ जइहीं। उ पचे आपन खातिर एक सासक क चुनाव करिहीं अउर ओकरे लगे आपन पहँटा होइहीं। यिज़्रेल क दिन असल मँ एक महान दिन होइ।”
Awadhi Bible: Easy-to-Read Version. Copyright © 2005 Bible League International.